Work

Chanson fort joyeuse, sur le chant
Du fond de ma pensee

Doit on blasmer celle qui veut à son ami,
Estre du tout fidele, sans l’aimer qu’a demi

C’est mon ami
Que j’aime voirement
En tout honneur
Et non pas autrement
Je lui serai fidelle
Sans varier en rien
Ma fantasie est telle
Mon ami le scait bien
Doit on blasmer celle, etc.

Faulx envieux
Ou avez-vous le cueur
De m’y blasmer
Et faire deshonneur
Entendu que suis celle
J’aimerois mieux la mort
Que d’estre trouvee telle
Qu’on a fait le raport
Doit on blasmer celle, etc.

C’est un vilain
Il m’a voulu blasmer
Pourtant qu’a lui
N’ai voulu acorder
Il à tant cuidé faire
Que je fusses à lui
Mais c’est bien le contraire
Car je ne hais que lui
Doit on blasmer celle, etc.

C’est un vieillard
Et un vilain Camu
Je mauldis l’heure
Que jamais je l’ai veu
Si j’eusse voulu prendre
De lui Or et argent
J’en eusse eu à despendre
Pour mes esbatements
Doit on blasmer celle, etc.

Je pers mon temps
D’aimer si loiaulment
Un tel meschant
Qui n’a entendement
Veu que j’estois si belle
Accoustré bravement
J’estois réputé telle
De mon commencement
Doit on blasmer celle, etc.

Jeunes espritz
Vivans joyeusement
Filles et filz
Legers d’entendement
Gardez vous d’avoir blasme
Et d’avoir deshonneur
Sans perdre corps et ame
Monstrez votre bon cueur
Doit on blasmer celle, etc.