Œuvre

Il n’est trespas plus glorieux
Que de mourir audacieux
Parmy les trouppes combatantes :
Que de mourir devant les yeux
De tant de personnes vaillantes.

O troys et quatre-foys heureux
Ceux qui d’un fer avantureux
Se laissent arracher la vie :
Et meurent d’un cœur genereux
Pour le Roy et pour la patrie.

De ceux la les oz enterrez
Ne seront de l’oubly serrez :
Ains recompensez d’une gloyre
Revivront tousjours honorez,
Dedens le cœur de la memoire.

Ah ! que je hays le soudart
Qui ha le courage couard
Et qui par une lasche fuitte,
Se trouvant au commun hazard
Le danger de la mort evite.

D’autant me semble-il villain
Monstrer son dos d’ulceres plein,
Qu’il est entre nous honorable
De porter au milieu du sein
Une cicatrice notable.

Ah ! Françoys soyons plus humains,
Ne nous tuons plus de noz mains :
Sus que noz guerrieres phalanges
Aillent en quelques lieux loingtains
Combattre les Peuples estranges.