Œuvre

I
Approche toy jeune Roy debonnaire
Du fier Angloys pour le prendre à mercy,
Et s’il ne veut pour à coup le deffaire
Laisse marcher le fort Mommorency,
Ne sçait il pas s’il n'est trop endurcy
Qu’injustement en ton havre il repose ?
Si donc il veut tenir compte cecy
C’est à bon droit qu’à ruine on l’expose.
II
Ren toy Angloys Le Roy te vient semondre
Car entrer veult la dedans Sans sejour
Tu ne veux donc que bravades respondre,
Or voirras tu tes murs et Rempars fondre
Avant qu’il soit la longueur de ce jour,
Chaque tabour
Frappe à son tour,
Fiffres sifflez
Cornetz enflez
Sonnez Clerons
Tonnez Canons
Entron Soldatz
Les murs sont bas,
La tour est esbranlée,
Prenons ces loupz
Tuon les tous
Ilz sont à nous
Leur gloyre est escoulée.
III
A mort A mort traistres A mort
De rien ne vous sert votre effort,
Vous vous fiez en voz murailles
Et nous au grand-Dieu des batailles,
Lequel en faveur de sa loy
Donne victoyre à notre Roy
IV
Helas Seigneurs ayez compassion
De l’innocent en son affiction
Ne meurtrissez le Francoys Catholicque
Pour le forfait du rebelle et inicque
Car tres loyaux avons tousjours esté.
V
Voycy le Roy des Roys le magnificque,
Canticque donc en soit à Dieu chanté.
VI
Loué soit Dieu notre Roy souhaitté
Vient entre nous pour les siens recognoistre
Arriere donc le Prince seducteur,
Car cestuy la n’est point le vray Pasteur
Qui veut ceans entrer par la fenestre.