Œuvre

Nous voyons que les hommes
Font tous vertu d’aymer,
Et sotes que nous sommes,
Voulons l’amour blamer

Ce qui leur est louable,
Nous tourne à deshonneur,
O faute inexcusable,
O dure loy d’honneur.

N’ature plus qu’eux sage
Nous a en un corps mis
Plus propre à cest usage,
Et nous est moins permis

O peu de cognoissance
De leur trop grand vouloir,
Et de leur impuissance,
Et de notre pouvoir.

O malheureuse envie
Des hommes rigoreux,
Qui privent notre vie
Des plaisirs amoureux

Si des le premier aâge
Ce sexe audacieux,
Par injure et outrage,
Voulut forcer les cieux

Et si fut si moleste,
Jadis au Dieu des dieux,
Osant son feu celeste,
Porter en ces bas lieux

Ce n’est point de merveille
S’il nous à aussi fait
Presque injure pareille
Sans luy avoir meffait.

Ayant par sa malice,
Introduit finement,
Qu’aymer ne seroit vice,
Qu’aux femmes seullement

Si leur outrecuidance
Sçeurent punir les dieux,
Nous aurons esperance,
Qu’ilz nous vengeront d’eux

Et sera la vengeance,
Les uns mourans d’avoir
Eu trop de jouissance,
Les autres de le voir.