Œuvre

Du clair soleil vient la lumiere au monde,
Mais de tes yeux vient au miens leur clairté
De ses rayons procede un chaut esté,
Des tiens en moy un feu cruel habonde

D’un esté chaud roussit la moisson blonde
Qui secheroit sans meur avoir esté,
Si ce n’estoit la douce humidité,
Qu’espand dessus la nue assez feconde.

Ainsi du feu qu’en moy vas allumant
Sechera tot mon pauvre corps flammant,
Si dessus luy n’espandz l’eau de ta grace,

O belle donc pareille au clair Soleil,
Commande tot à ton privé conseil
Qu’à mon torment quelque faveur on face.