Œuvre

Chanton de Dieu les merveilles
Et les forces nompareilles,
Chanton qu’il monstre aujourduy
Qu’il n’est Dieu pareil à luy,
Tous ces dieux imaginaires
Dieux de cervelles lunaires
Scrutateurs de ses secretz
Il renge soubz ses decretz.

Leurs beaux desseingz leurs menées
Sont maintenant terminées
Leur Thimote et Philarcas
Les vont retrouver là-bas,
Henry soubz ses piedz les presse
Henry qui fendit la presse
Et qui tient enfermé or
Le tresmeschant Nicanor.

Henry dont le sang illustre
De Charles Roy prend son lustre,
Roy que Dieu fait la terreur
De l’exces et de l’horreur,
A minuit vint la nouvelle
De sa naissance tresbelle
A minuit Sire avez sçeu
Quel’heur vous avez receu.

Voz ennemis voz contraires
Voz hayneux voz adversaires
Voz rebelles sont deffaits
Et du ciel revient la paix,
O, Sire, Dieu pour sa gloire
Vous à donné la victoyre
Rendon lui pour ce bon heur
Sans fin louange et honneur.