Œuvre

Celuy qui dit les Astres nous conduire
Selon leur mouvement
Si que n’avons la puissance de fuire
Leur divers changement
Et que les Roys peuples et princes
Par eux maintiennent leurs provinces
Tel homme est plein d’inicque jugement

Car à bon droit le meschant pourroit dire
Pourquoy me punit on
Et le meilleur ne devroit sur le pire
Emporter quelque don
Puis qu’au bon ou meschant affaire
Nul d’eux ne peut autrement faire
Nul d’eux aussi ne merite guerdon.

Car en l’humain faut deux choses congnoistre,
C’est l’esprit et le corps
Qui font en luy deux vouloirs apparoistre
Remplis de grandz discordz
Car le corps veut son humeur suivre
Et l’esprit veut prudemment vivre,
Rompant du corps les sensuelz effortz.

Quand Sçevola, de la vertu complice
Brusla sa main constant,
Et que les saintz s’offrirent au supplice,
La foy leur assistant,
Bien que la chair feist resistance,
L’esprit n’eust il pas la puissance ?
Autre animal n’en sçauroit faire autant

Ou si le bien doit remporter salaire,
Le mal punition :
Soit donc d’âutant qu’on peut plaire ou desplaire,
A sa complexion,
Et que des Astres l’influence
Donne de lieu à la prudence
Dont s’enrichit notre condition.

Et ne faut point que l’on die habitudes
Les forces de l’esprit :
L’homme premier sans labeurs ou estudes
De son facteur les prit :
Qui le créa franc en son estre
Comme de vice et vertu maistre
Qu’a son vouloir il condamne ou eslit

Et c’est pourquoy l’homme noble d’iffere
D’avecques le brutal
Quand par l’esprit il fait au corps parfaire
Le bien au lieu du mal,
Prenant de l’Eternel sa force
Qui toutes choses s’il veut force :
Voire s’il veut tout ce qu’on dit fatal.