Œuvre

Qui voudra voir dedens une jeunesse,
La beauté jointe avec la chasteté,
L’humble douceur, la grave majesté,
Toute vertu, et toute gentillesse.
Qui voudra voir les yeux d’une déesse,
Et de nòs ans la seule nouveauté,
De ceste dame œillade la beauté,
Que le vulgaire appelle ma maistresse.
Il apprendra comme Amour rid, et mord,
Comme il guarit, comme il donne la mort
Puis il dira, voyant chose si belle,
Heureux vrayment, heureux qui peut avoir
Heureusement cest heur que de la voir,
Et plus heureux qui meurt pour l’Amour d’elle.