Work

D’un gosier machelaurier,
J’oy crier
Dans Lycofron ma Cassandre,
Qui prophetize aux troyens
Les moyens
Qui les tapiront en cendre.

Mais ces povres obstinez
Destinez
Pour ne croire à ma sibille
Virent bien que tard apres
Les feuz Grecz
Forcenez parmy leur ville.

Ayant la mort dens le sein.
De leur main
Plomboyent leur poictrine nue
Et tordans leurs cheveux gris
De longs cris
Ploroyent qu’ilz ne l’avoyent crue,

Mais leurs cris n’eurent pouvoir
D’esmouvoir
Les Grecz si chargez de proye
Qu’ilz ne laisserent si non
Que le nom
De ce qui fut jadis Troye.

Ainsi pour ne croire pas
Quand tu m’as
Predit ma peine future :
Et que je n’auroys en don
Pour guerdon
De t’aymer, que la mort dure :

Un grand brasier sans repos,
Et mes oz,
Et mes nerfz, Et mon cœur brusle :
Et pour t’amour j’ay reçeu
Plus de feu
Que ne feit Troye incredulle.