Work

Voyci la saison plaisante
Florissante
Que le beau printems conduit,
Voyci le soleil qui chasse
Froid et glace,
Voyci l’esté qui le suit

Voyci l’amoureux Zephyre
Qui soupire
Parmy les Santes de fleurs
Voyci Flora sa mignonne
Qui luy donne
Un baiser tout plein d’odeurs.

Voyci Pomona la belle
Qui pres d’elle
Voit son amy Vertummus,
Voyci Vertummus qui d'aise
La rebaise
Mille foys le jour et plus,

Voyci Venus Cythérée
Bien Parée
Qui tient Mars enamouré
Ses graces et mignotises
Bien aprises
Des combatz l’ont retire.

Voyci du saint mont Parnâsse
L’umble race
de Jupiter qui descend :
Voyci toute ceste pleine
Desja pleine
De son doux miel plus recent.

Voyci des Nimphes cent mille
A la file
Qui sortent des eaux et boys,
Et chantent toutes ensemble
Ce me semble
Le noble sang des Valoys.

Dieu vous gard’ troupes gentilles,
Dieu gard’ filles,
Dieu vous gard’ toutes et tous
De grace ou vous allez belles :
Immortelles,
S’il vous plait dictes le nous.

Nous allons chassant discorde :
En concorde
Maintenant icy vivrons :
Nous l’offrons à ta vaillance
Roy de France,
Et Mars vaincu te livrons.

Roy genereux, franc et sage,
Ton partage
T’est si droictement acquis
Que par sa force perverse
Qui renverse
Jamais ne sera conquis,

Joüy de ces verdz boccages :
Et rivages,
Joüy des fruitz de noz chams
Nous sommes de ton lignage
L’heritage
Malgré les hommes meschantz.