Work

Que des baisers de sa bouche
Mon amy la mienne attouche,
Car tes baisers amoureux
Sont plus que vin savoureux.

L’odeur qui de ton musq part
Ton nom comme unguent espard,
Pource les belles pucelles
Te desirent avec elles.

Tire moy donc amy tire,
Nous courrons apres toy Sire :
En ses chambrettes le Roy
Nous fait chanter avec soy

Parquoy souvenance aurons
De tes amours qu’aymerons
Voyre plus que le vin mesme
Car qui est droicturier t’ayme.

Filles de la Cité saincte,
De couleur noire suis teincte :
Mais plaisante toutefoys
Comme les tentes des Roys

Pource esgard à moy n’ayez
Si brunette me voyez,
Car le Soleil qui me garde
De son ardeur me regarde.

Les filz qui sont de ma mere
Jectent sur moy leur colere,
Puis en leur force ilz me font
Garde des vignes qu’ilz ont

Ainsi san garde on detient
La vigne qui m’appartient :
O amy qui sçais ces choses !
Mande moy où tu reposes.

Car pourquoy seray-je comme
Celle qui craint qu’on la nomme ?
Se tirant vers les troppeaux
De tes compagnons loyaux.