Work

Le celeste Flambeau
Des astres le plus beau
Tournant en double cours,
Et ordinaire
Ne font point tant de tours
Qu’on m’en fait faire.

L’ample mer est souvent
Agitée du vent
Mais je suis tourmenté
Plus que son unde
Par ma folle bonté
Servant au monde.

Des que fuz mis es mains
Des hommes inhumains
Mars le monde troubla
De meurtre et de vice,
Et la terre combla
De maléfice.

Depuis je n’ay cessé
D’estre fort oppressé
Finement attrappé
Par mer et terre
Fondu, forgé, frappé,
Porté en Guerre.

Tous les jours cizaillé,
Fricassé, tenaillé,
Par tant de mains passé,
Mal à mon aise,
Chargé, cloué, cassé,
Mis en fournaise.

De l’un suis trop aimé
Qui me tient enfermé,
Et l’autre desirant
Vivre en liesse
Tousjours me va tirant
Piece apres piece.

Je n’ay aucun plaisir,
N’y repos, n’y loisir
En un lieu sejourner
Et me faut estre
Prompt à me destourner
Et changer maistre.

O si la paix d’enhaut
Ca bas faisoit un faut
Mes membres monnoyez
Seroyent plus fermes
Et trop mieux employez
Qu’à faire allarmes.